إعلان 728x90

مسرحية وين رايحين؟


مقطع من مسرحية
 وين رايحين ؟
قلم: أحمد بلقمري
المشهد الأول : ( ينادي سليم على اسماعيل من تحت شرفة منزله ، فيخرج عليه اسماعيل يحمل منشفة و الماء يقطر من على وجهه ...).

سليم: آ اسماعيل، آ اسماعيل.. واينك؟.. ارواح، اغصب الله يخليك...
اسماعيل: راني هنا، هاني جاي، بعقلك واش كاين.. تقول تحرقت..
سليم: اسمع قداه راك تسالني؟.             
اسماعيل: واش متقوليش رايح تخلصني، واش كاشما سرقت؟...
سليم :اسمع بركى من الهدرة الزايدة، صح معنديش بصّح...خلينا، المهم نقلك حاجة زيد اصبرني شوية على الدراهم، والا مخلصتكش اسماح بيناتنا وخلاص.. منعرف راني حاس روحي مانيش رايح نطول في هذي الحياة.. راني مخنوق وربي يستر..
اسماعيل: واش راك تقول؟، ربّي يهديك.. خير برك.. واش بيك؟.
سليم: منعرف راني مقلق وخلاص..هيّا تبقى على خير..راني طولت..
اسماعيل: يا سليم، وين رايح؟. اسمع، يا سليم ، سليم.. ( يغيب سليم عن الأعين بسرعة).
اسماعيل: يا درى واش بيه؟، ماشي عوايدو، آواه الحالة نتاعو مطمنش؟!!...
المشهد الثاني : (يدخل سليم المسرح ..يجلس لوحده ،واضعا رأسه بين رجليه ،محدثا نفسه ...)
سليم : واشمن حياة راني عايشها، حياة الكلاب وي..الناس راها عايشة، تقرا، تخدم، تبيع، تشري، تمشي، تجري، تخطب، تتزوج.. و أنا، أنا..أنا ديما وحدي، كاره، مديقوتي، الصلاة وبطلتها، صحابي وخطيتهم، قرايتي وحبستها، كاشما بقالي؟؟؟.. مازاتلي حاجة واحدة.. نعم، حاجة واحدة.. أنا موتي خير من حياتي ..أنا خلاص .. ( يأتي اسماعيل من بعيد ...).
إسماعيل: هايواه، مزية لقيتك.. واش خويا ؟، خير برك، ماشي عوايدك.. آسيدي ماكنش مشكلة ومعندهاش حل، راني هنا احكيلي، فطفط، اهدر، خرّج واش في قلبك ..
سليم : (ينظر إلى اسماعيل بنظرة فيها كثير من الكلام ، ثم يغادر المكان قائلا:)
سليم:ابقى فيها وحدك راني رايح ...
اسماعيل : سليم ، آسليم ، آ سليم.. رابي معاك آخويا، واش رايح نقولك..
المشهد الثالث : (ضجة كبيرة في الحي، حركة غير عادية، صوت سيارة الإسعاف، سليم يهدد بالانتحار حرقا في الحي، الناس يتحلقون حول المشهد، واسماعيل يلتحق بالمشهد ...)
سليم : واحد ما يقدّم، اللّي يقدّم نحرقو معايا.. حقرتوني...،آه، قلتوا مايخدمش.. ما يدير والو؟،آه.. هاني رايح نهنيكم من روحي.. هايليكم الدنيا.. ابقاو على خير.. هاني خليتهالكم.. اخدموا نتوما، اقراو نتوما، اتزوجوا نتوما.. أنا خلاص، أنا خلاص.. واش حقرتوني قلتو يتيم، لا والي و لا حبيب ..هايليكم ،هايليكم، هايليكم...(ويصرخ بالبكاء...)
اسماعيل: يا سليم واش بيك آخويا ربي يهديك، العن الشيطان، ياخويا أنت إنسان مؤمن، واش بيك.. أرواح خويا.. طيش واش في يدك..أرواح أخويا...
مسرحية وين رايحين؟ مسرحية وين رايحين؟ مراجعة من قبل Ahmed Belgoumri في 8:23:00 ص تصنيف: 5

ليست هناك تعليقات